فاتك حنان كل العمر

كنت ناوي على الفراق كنت ماسك في الجمر
و البينا داك صابح سراب لمن أبيت قلبك تسر
من لما فتني يا حبيب فاتك حنان كل العمر
            والليلة جاي عشان خلاص
               في الدنيا لاقاك كل مر
من بعدي كيف كان الأسى و مين القال إنو بيسر
ما كنت فاكر يوم تغيب بعدك ح أعيش الدنيا حر
              صدقني عشتك في العذاب
              من وجعي ما لقيت لي مفر
نادتني دنيا الوحدة زيف في البعد شلتك ألف سر
طولت في النسيان عشان من قلبي عشماناك تمر
لكن خلاص ضاع الأمل و تعبت فجأة بقيت بمل
أديتني فرصة مع الغياب أنساك مرة على الأقل
                يعني الرجوع أسوء خيار
              من دونك أحسن و لاقيه حل
القصة خلصت بي جفاك و رجوعنا ما ح يضيف سطر
و أنا ذكرى واجعة عشان كمان فاتك حنان كل العمر

ما مسامحه في أي شئ

ما ياما قلت خلاص سماح
مش ياما خليت باقي لي
لاحقة الأمان من ماضي راح
كل الخلق كايسة الطريق
كم زول وصل بسكة صاح?!
مش برضو لليوم الجديد
بتشيل معاك نية السماح
عشمان يكون أجمل أكيد
مستني فيه الإرتياح

و أنا فاكرة من عدة سنين
شديت رحالي و من بعيد
ناديت على نفسي و مشيت
وريتها بكرة في يوم جديد
صانت قديمي و ما حكيت
سامحت بتذكر زمان
شاغلاني نفسي معاي بقيت

بعد الوقت جرى بي كتير
راجعت وجعي الكان قديم
بي حرقة جات نازلة الدموع
ما فاكرة كان الشلتو فيهم
ما أديتها فرصة زمان تكون
ما أدتني فرصة أحس بيهم
شايلين هزيل حس الوجع
عاطفين علي حنيت عليهم
بعد البكى،، إستغربت فيهم
من وين هي جات لي تشتكي
أنا كويسة عايشة مع السماح
يعني الدموع من وين تجي?!
فتحت أحضاني و لقيت
رغم إني بادية و من جديد
ما مسامحة كان في أي شئ
لا نازفة لاااا من العذاب مستضعفه
لا كل يوم بسرد وعود و أجي أخلفا
ولا كنت وجعة قصه أو متكلفه
و العشتو رايح نصو خوف
و الدنيا ما بستهدفا
و الماضي عايش لسه حي
ما ناسية خوف كتمو الوجع
لا ما مسامحة في أي شئ

لما الأحاسيس تختفي

لما الأحاسيس تختفي
قبل العتاب ما بينا صابح منتهي
و الإنتظار لي أوضح الأوجاع
و أجمل من تجي
و كأنه كان كل الكلام
جوة المعاني بيرتشي
حتى الحكاوي و كان و كان
زي ذكرى لي عالم خفي
لما الأحاسيس تختفي
يبقى السؤال طالع غلط
و الديمة ليك في قربو حق
تلقى المسافة بقت فرض
و الكنت بتحسو بأمان
خان الأمان هاجر أحاسيسك مرق
لا فارقة يبدأ يكون بعيد
لا حتى متمني القرب
و ح تحسو كيف!!
عمرك و كان بحبي بأمل
تلقى المعاني الرايحة فيه
فجأءة إنتهك زمنك ملل
علشان رجيت العشت ليه
علقت في بالك صور
راحت و ما إتعلقت بيه
و الحيرة تبدأ تخش عليك
معقولة في بداية الطريق
ألقى الحريق
كل الجمعتو بيتسرق
معقولة فطاني المطر
واقف براي و أنا بتخنق
إتبرا مني الحس و فات
و الذكرى غطاءها التلج
و الباقي باقي من الرماد
لو فيه نبض
يادوب يعيش علشان يهد
و كيان بضيع أو بختفي
لا راضي قلبك بالسكوت
لا بالكلام عايز تفئ
و تبدأ الأحاسيس تختفي
لا إنت مهتم بالفضل
لا نفسك إفضل منو شئ!

أنا عايزة نرجع زي زمان

و أنا كل ما صورتك تمر
بتقل على خاطري الحمل
خاطر سند دايما و شال
ولا حبو ليك في يوم كمل
إحساسو بيك ياداااب برد
كان لسه عشمان فيك أمل

و أنا شايفة جد إنك تقيل
قربك دا شئ لا يحتمل
حبك و مخلوط بإنتظار
و الإنتظار شايل ظلم
أما الثواني معاك خوف
ولا زول وحيد منك سلم

و أنا عايزة نرجع زي زمان
ما بينا غير بسمة و سلام
و كان عوزت تحكي معاي في يوم
بكويها في خاطري و بجيك
و ما تخاف أعوزك ما بجيك
بس نفسي نلغي الإهتمام

و كان شفت بعيوني الحزن
إياك تسأل زي زمان
في خاطري منك جد كتير
إياك تعاين لي عشان
ما ناوية ليك أشكيك كتير
و أنا برضو لا بسأل عليك
لا بيك ح أهتم في المكان
ما عندي أكتر من بعاد
يا ريتو ظني القاسي خان

أنا عايزة نرجع زي زمان
ما بينا إحساس ببعض
ولا بينا روح حابة الكلام.

معنى كيان ميلاد

#نادتني، أرجوك تسمعي..
أنا في الفراش راجيه الممات
خليكي آخر ثانتين..
فيني الكلام و ليك الجواب
و أنا برضو عنك ما غريب..
أنا ليك بكون الذكريات!
و أنا قلت يمكن بنخدع
و يمكن يكون دا صدى السكات
قالت ولااا بهوى الكلام
دي وصية الماضي اللي فات

قالت نسيتي الإنكسر
بعتي التعب بالأمنيات
صاحبتي أحلام الخيال
كنت الضباب و اليوم ميعاد
قالت رميتي من العمر
أيام مجال ترجع شباب
و محيتي كم إنسان عزيز
خوفا يصير ليك ذكريات
و لمن أعوز أتونسك..
تنشغلي مني،،
عشان براي البوجعك
و أنا بالوجع أتعشمك..
لمن تضيع الذكريات

وأنا برضو منك ما بشيل
لا بنسى لا عندي البديل
بفضل معاك..
في كل شوق
في كل مر..
دايما معاك في كل جميل
بتحملك لو زرتي ذكرى مع الدموع
و بشيلها ليك بعد الفراق ذكرى الرجوع
و تنومي و أفضل أحكي ليك
ذكري الخيال
و أتصبر الأيام تجيب
ما بينا للكلمات مجال
و أنا برضو منك ما بشيل
لا بنسى ولا برضى البديل

سايباني و الأفكار..
تكذب فيني كل البيكي كان
و بقيت أضيع كم معاني
و أضيع الذكرى الزمان
من غير قصد..
بقى ليا في النسيان مكان
نص عمرك أنا ودعته جد
و الباقي جافيكي السلام

و إنتي الفضل ليك بس سنين
تحتفلي فيها بعيد ميلاد
مبسوطة و أنا منك بفوت
علشان بعيد زارك بكى
موتي فيك الذكريات
و أهو شوفتي راح بيك الزمن
و أهديتي ذكراك للممات
مفتكرة ودعتي الشقى
أنا كنت معنى كيان ميلاد...

ثواني الإنتظار..

قول لي بعد ما أعيش
ثواني الإنتظار.. ليك بفتقد

كلمني بعد الفرحة من قلبك تروح
و تعال بسرعة عشان أشيل عنك جروح
م أنا وحدي بحضن خوف ظنونك بعتقد

أشكي الزمن في كل يوم
شيل الوجع جواك لوم
و عيش ليك براك..
وخليني ضامن إني ما يوم بتفقد

أحكي الألم بإنكسار..
و شهدني ليك الدنيا لو تنصف محال
و كون كالضحيه من الملام
و أنسى الكلام ساعة الآمال
لو موسم الأفراح بعد

قول ليا بتعب في السنين
عيشني همك و الآنين
أهتم و أشغل بالي بيك
أسرح ووأحلل و أفترض
و أديني نفسك لأجل ما أسعد خطاك
أديني كسرك.. و عارفني ما بكسر رجاك
م أنا وحدي بحضن خوف ظنونك بعتقد

و أنا..
أبعد حياتي و أحيا بيك
أنسى الجروح الفيني و أفضل
أستنى فرحك يوم يغيب
و أديك من البسمه المعاي
و أتشايل أحزانك رفيق
و إنت الفرح لمن يجيك
ألغيني مع ذكرى الألم
خليني في قلقي العليك
غلطانه بدفع في التمن
خليني ليك أبعد بعيد
و أنا كنت فيك لايمه الزمن
و لو إنكسر فيك أي خاطر
أرجع تعال.. ما تجتهد
و قول لي بعد ما أعيش
ثواني الإنتظار.. ليك بفتقد
لا تسأل أنا كان حالي كيف
ولا في الملام شايفة الفرق
بس قلت ليك أنا
أوعى تضمن قربي ليك
م أنا بعرف أجفى و أبتعد
لو يوم رميت العندي ليك
فايتاك و سايباك تفترق
و أهو بالسنين بشفى الصبر
بتلاشي شوق رغم الفقد
و تعكس معاني الآيه
ليك برضو إعتبار
و تعيش ثواني الإنتظار.. و لي تفتقد!

يوم قلت لي بعدك بضيع

يوم قلت لي بعدك بضيع

..و فراقنا ما بتخيله

لا يمكن أرضي في يوم أبيع

أنا قلت بتشيل الصبر؟!

قلت الصبر جنبك ربيع

طمنت قلبي و وحدته

غيرته من جاف لي وديع

أنا بيك حمدت المولى باكيه

جنبك ليالي لقيتها صافيه

..و كم كنت داساك

بس قلبي كان رايد يذيع

خليتني أفرح في الثواني

علمت إحساسي القديم

إنو الحزن في الخوف أناني

و بقيت أخاف لو يوم تروح

لأجل الظروف أو جات جروح

من غيرك أرجع أعيش براي

أتجاهلك.. و أفقد هناي

أو يوم قريب زارك ملل

بعدك بروح و الروح تروح

...و بعدت بيا  

و بقيت أسيب و أقواك شويه

...ما قسوة فيك 

بقسى السعادة المافي زيها

م أنا خايفة يوم تجفاو حناني

و ألقى المضيق بيزورني تاني

ما لومت قربك أو هواك

..ولا خنت وعدك

ولا كنت عايزة أعيش بلاك

من حبي فيك خفت الممات

خفت المسافات البعاد

..و ألقى التعلق بيك زاد

! و مخاوفي جات

و البعد صادم في اللؤى

  صادف هوانا الكان وديع

لا دمت لا دام الربيع

و عرفت أتحمل وراك

لا خايفه ذكراك لا بتضيع

ولا نمضي نحزن في الزمان

 بس يعني لقياك فات سريع

..خوفي العليك

قواني بعد الإشتياق

..و خوفك علي

شايلاهو فضلا في الفؤاد

و ما قلت ليك يوم كم بحبك

لكني بهواك حتى لو حكم الفراق

تستاهل الأشواق زمان

م الشوق لقى الحظ في هواك

قدر إنقسم.. لولاكَ كان زرت الهلاك

و صدقني رغم إنك حكيت

حبيت و بالأشواق بديت

بس قلبي إحتاجك يجيك

و عشان يدوم بينا السماح

إياك تلوم خوفو الفظيع

عودته فرقاك و الوداع

.م أنا قلت من بعدك بضيع

عشان ألقاك

جيت من وين؟.. وفجأه بقيت؟

جيت تسأل مكان جواي بعد ضليت؟

جيت لامس خُطى التوهان تفتش فيني دُنيا و بيت

و أريت ما جيت

منو الوصاك على فُراقي؟

منو القال ليكَ ما يهمك؟

منو الحكى ليكَ عن طيبتي؟

و منو القال حتى لو تظلِم, بسامح ببقى من دمك؟

أنا الما بيعني لي همك

...و أنا الكُنتَ

بحاول أحفظ الفُرقات و أرسم في الضباب تعبير

و أفتش ليك بقايا الذِكرى من زمني الوعيت عارفاك

بفتش لي أثر تغير عشان ألقاك و ما بلقاك

بينا حِدود حِصار و مصير.. و تفضل غَير

 و أقول معليش ح أسيب ليك فيني حِته تعيش

أقول ح ألقاك و ما ح أندم.. متين ح أعدي زمن الطِيش؟

وتفضل غَير.. عشان ألقاك

تعال كلمني عني زمان تعال كلمني عن قُربك

تعال كلمني عن أوقات رميتها و باقية في قلبك

تعال كلمني يمكن ناسيه يمكن جاحده ليك فضلك

مدام لايمني على بعدك

...أو أسمعني

أنا البعدك رِضيت قَدَري

و أنا البَعدَك بسامحك لما ما تفهم و بظلمني

و أنا الما عايزة يوم تقساك و ما تسيبني

طب أحكُم إنت لو قادر

حاسب لملم الفاضِل

معاي حاوِل تقدرني

عايشة بلاك؟؟

كمان ناسياك؟؟

دا منك إنت ما مني.. و جيت أغشاك أزور دُنياك

لقيتك مني باعدني

عشان ألقاك و ما بلقاك.. ولا ح ألقاك

نسيتك و إنت ودعني

صابره عليك

صابره عليك عشان عارفاك

حُزنك لخبت الأكوام

و عارفة الخوف دا ما مني

و عليَّ معاكَ لي قِدام

و عارفة رفيقي ما بجرح

بس مجروح جرِح بردان

و لو تأخيرك إتأخر

ليكَ في قلبي ياما كتير

و ليك من ذِكرى لي ذِكرى

لحظات خير و حاجات غير

بحفظ ليكَ شوقي و أكيد 

أكيد الخِيرة في التأخير

شكيتك ياما لي نفسك

شكيت حُبك رمادي اللون

و راضية معاك أعيش تعبك

و لو زعل السنين مركون

بزيحُه معاك بالذرات

ذرة بذرة نمحيهُ

ولا بورّاي أسيبك يوم

....و نادي هواك

ونادي هواك بجيك ما تخاف

و عُمرك عندي ما بتهون

و ليك أنا فيني نصف أنصاف

و باقي الباقي ليك بيهون

و هاك أحسب أصابع الناس 

على أعدادها ليك بصبُر

عشان ما مُمكن أخسر يوم

روح على ضيقي تتقَهَر

و زي ما ضِقتَ يوم قسواي

عليك أنا صبري يتصبر

بحبك, يعني باقية معاك

و عشان أنساكَ ما بقدر

و شوقي بشهدو الأيام

و حِسو براكَ كيف بكتر

و لما نفوسنا تتصافى

ح تلقى الحُب طريق أخضر

حافظه وروده ليكَ عشان

.عشان البينا دام أكبر

إشتقتَ ليك

                                                       

                                           سلم علي و قال ليَ, عفوا.. إشتقتَ ليك
                          رديت سلامو و قُلتَ ليهو: معليش بذوق.. 

                                  ما أظن في دُنيا جمعتني بيك

                                   قال لي: كتير جمعتني بيك 

                                    و جمعنا حُب ما كان قليل
                                  ..و قصرتَ فيك, غلطان عديل

                                      لكني هسي إشتقت ليك
                                                                          :قال لي
                   كُنتي تحني لي.. و علي تميلي و تحكي لي

                                كُل الجميل فيني في عينيك 

                                  و تبوسي راسي و تدعي لي
                                 ..و لمن همومي تضيق علي

                                   صدرك يشيلني و يبقى لي
                                    زي بيت جميل ما ليهو زي
                                      ...و زي الطفل بتغني لي

                            و تنوم عيوني و تَنَسي إيديكِ إيدي
                                         ! كل الهموم الكانو لي

                                                                                    :قال

                كُنت زولاً جد أناني.. وقتاً نكرتِك من زماني

                                 و خليت ملاكي في نص طريق

                                            لا عارفة غيري ولا مكاني    

                                         ولا ليه بِعدتَ ولا إيه زواني

           أنا كُنت زولا جد أناني لكني هسي إشتقت ليك

                                  و نادم زليل محتاج إليك..

                             مُحتاج اكون بيك تاني زول
                                إنسان بحق ما زول خيالي

                                و وقفتَ سارحه فيه... ثواني
                                   كلامُه غَيَر إحساس سلامي
                  و لسه حُبه في مكانُه و قلبي ليهو بيزيد حنانُه
               بس لسه خايفة من جفاوتُه لسه قسوتُه ما نسيتها
                                                                                             :و قُلتَ ليهو

     معليش حبيبي.. نفسي ما برضا تشوف زي اللي شافته في جفاك"
              ". مبسوطه بشِعورك دا بَيٌ لكن خلاص بِقى ذكريات

صبحان بخير

و الليل غشاه جمر الفُراق

بعد النسيم زاره التعب

و قايد لهيب الإشتياق

حتى النفس صابح صعب

و في الصُبح عبرة إختناق

وجعة حنين ألم إنكتب

و الذكرى لاحقها إفتقاد

و الجرح للماضي إتحسب

و لسه الصباح بترجى خير

جاهو الهلاك قدر إتثبت

ودع مخارج الدُنيا غاب

و الدُنيا بعده إتمسخت

أداها واجب و فارقها

و خلاها للأحزان مدد

صبحان بخير تحت التُراب

!و ميتين وراءه ناس الأرض