فُرصة

إستبيح رغم الظروف
فرصة تعشق في آنينك
حِبْ مداخل ذكرياتك
لما تاهت بين حنينك
و حس مداكَ على الممرات الطويلة
و عامل إحساسو بيقينك

فُرصة واحدة.. بيها نبضاتك تمسا
لا بتضحك فيها خايف أو بعد نفحة مدسه
حُزنك أصلا ليهو أقدار المُودع
و إنت دارت بيك مواقيتك و لسه

و لما تتعب..
سامح أوجاعك و نوم
حبة ترتاح و إنت ماشي
لا قصص لا خيوط هموم
و تبقى أجرأ ما يكون !
مرة تجري و مرة ترسى
تاني صارح و حبة دٍسها
و فرصة تحسن في الظنون

شيل من الفرصة السعادة الما ح تتمناها تاني
و راحة الدنيا البعيدة كأنك زول بعاني

يعني دُنياك.. قدر ما تقدر تحسا
أبقى أجمل من جراحها
و إنت أجمل بصراحة
''أوعى تتخطاك و تقسى''
و بُكرة لمّا تلاقي بُكرة
في ذِمة الأيام دي فُرصة.

” لا بأس “

لا بأس من أسباب رحيل
بطلتَ دونك أعاتِبا

أو مِن طويل الإنتظار
بقى ما مُهم أستوعَبا

لا بأس لو ساقك ضلال
لي حاجة ما كان موعِدا

ماشيها سكة بدون رفيق
و أنا ما أبيت أو قلت لأ

و لقيت مُرادك أو فَنيت
فالعبء على مين إبتدأ

و سواء قدرت تكون براك
أو لسه ما ثبتت خُطاك
ح تعيش...
..و أعيش مُتأكده
مَهمَنْ تلاقي و ألاقي ناس
ما ليها معنى الذكِرى من دُون سَيّدا

لا بأس و إِنْ فُتَ التفوت
و إياك تجرح تاني زول بالشكل ده.

ببساطة.. بحب أسامحك

ببساطة..
ليك حنين زايد في بُعدك
و إنتَ رُحتَ
عِشتَ شبه وحيدة بَعدك
و ما إسترحتَ

بِتَّ بتألم عشانك
و الحنين عذبني حبة
فجأة كُل الكون تلاشى
إتقطعت سُبل المَودّة

شُفتَ ويل الغيرة لما..
رِضيت مكان في الكون ده غيري يحتويك
و إني بعد الفُرقة مااا وطنك في حُزنك
لا كمان بقى صاح أكسِر أي حاجِز شان أجيك

ولا قلبي؟
قلبي كُل ما تمُر بدونك ثانيتين
بيقول كفاية
خايف يتجرع مرار بُعدك سنين..
لو دي النهاية!
كان بيرفُض يبقى زيك
عاش رفيق وَفي للرواية

كُل مرة تهيم بدوني
تلاغي غيري و غيري جارحك
و لما بالأحزان بترجع
مين هو غيري الكان بصارحك؟
رغم إنك ديمة جاحِد
و رغم تعبي بَحب أسامحك.

الشوق وجب ؟

                  الشوق وجب ؟
                  فتن الوداع بينا،،
                  المسافة بقت سبب ؟

                  " و كم قلب صآح في إتجاه سَلَكهٌ المُحِب؟
                  لا ريقهٌ إتبلا بوِصال، لا صَيِّحة بَرَدتْ اللَهَبْ "

                  أوعك تصيح،،
                  يا قلبي مااا تسوق العوج
                  دابو الفراق بشوقنا هاج
                  ح نضوق مرارة الإحتياج
                  من جرح و إحساس مزدوج

                  زي أي روح فقدت حبيب
                  شالت عليهٌ الشوق عتب
                  و تعاني من ساعة يغيب
                  لين تقوى، تاني تعيش تَحِب

                  أوعك تصيح،،
                  ما كُل جريح ح يعيش جريح
                 ولا كُل جريح بيزيد مرارهٌ بِلا مُحب.

و لمن الأيام يعدو...

بس لمن الأيام يعدو
إتذكر إني بقيت عليك
أو بعد ما أفراحك يمضو
إتذكر إنك ما وفيت
و أنا مالي مال كل الظروف
أنا ديمة كُنت مكان و بيت

ياريت كمان وقت الفقد
تندم شويه..
على الهوان الشِلتو لي
و أحلف على نفسك تصون
بعدي الببقوك تاني حيّ
ماف زول بموت رواء أي زول
لكن صعيب تلقالي زيّ

و أسمحلي لو ما بوجعك!
أحكي الحكاية الياما خُفتَ تعاني لو واجهتها
لا عُمري حبيتك ولااا..
ليك يوم مكان الحُب فِضا
ولا كُنت مثلاً يوم تغيب
بحضن خيالك وقتها
كان حالي حال زولاً صديق
قَدّرْ مواجع عشتها

و شان ما يضيع مغزى الكلام
أنا ما هويتك شان أشيل هم المسافة
اللي زمن حَكمْتَ قلبي إخترتها
لكن برُد في إعتبار نفساً وقت
ضاعت خُطاك..
..فاحت أمان
..جيت خُنتها.

وحاتك.. بعيد أحسن

وحاتك شُفت ناس ياما
بترجع عن كلام و وعود
و شُفتها برضو ندمانة
و بتتمنى لحياتها نعود
و شفت دروبنا يوم تقسى
و تمحق فينا حُب معهود

فلو تفضل بعيد أحسن
عشان الشوق ده ما دربي
و لو بفرض حدود مثلاً
عشان بحميكَ من حُبي
و أصلو حِدايا ما تأمن
لأنه الجايّ لو جرحك
تقول مجروح..
و أقول الذنب ما ذنبي

و ما دُومتَ بتخاف القُرب
يبقى البُعد ليك أضمن
و ما دُومتَ في هواك بتشُك
فلا تحتار ولا تحزن
عشان لو بُكرة أثبت ليكَ
إنك جنبي هنا أءمن
أنا الما عايزة تبقى عليك
ولاآا بالقُرب بطمن

فلو تفضل بعيد أحسن
بلاهو الشوق يبيعك لي
و ما تقول ليا بقسى عليك
و وينها القسوة ديك قول لي ؟
شان ببعد آذاك
..و معايا قلباً حيّ ؟
بعيد أحسن
و ما تحرش ضميري عليّ..

بتتأخر

‏بتتأخر..
بطيء ميعاد تلاقينا

و لي عِلمك..
بتبهت كُلِ يوم فِكرة
و بُكرة أظنو ما لينا

عشان لساكْ بتتأخر..
مُتقِل حِيل خطاوينا

و يااا دي العِزة دي الماسكاك
و شالت نوم ليالينا
البكاك زمان ظلمك
و ظالم إنت عينينا

و ما أصلو..
مداك كان طال و كان قصر
مصيره هواك يصافينا
ودادك لينا ما إخترته
قليبك فيك و بيجينا

سهاد ليلي اللقيتو معاك
أريت ذِكراهٌ لو تثمِر
دوام بالريد تواسينا