عزيزة عليك و بتهمك،،
بتحلى القصة دائماً بيها في الأول
تشيلو معاك تقيل همك،،
أريتها تدوم و أريت حبل الخُطى يطول
بتسأل ياها هي الجنبك،،
جميلة الروح و عنك ما بتتحول
و لو تسأل أكون لك إيه؟
غريبة بقيتي ما عايزاني زي أول!
عزيزة عليك؟
خُطاك تتقل
مشيك في السكة ما مطول
عليها تغيب..
تسيب ذكراك بتتجول
و عزيزة عليك.. ؟!
مُمكن أحوالنا البِتَقبِل
يوم تَفضِل..
إنه تِفصِل لينا ما بين المراحل؟
و إحنا نقدر يومها نفهم
ياتو حُزن مصيرهٌ راحل!
و يقدر إحساسنا المُهَمَش
يلقى فرقات أو فواصِل!
م الظروف عاجل و آجل
بس هو مُمكن لِأجلــما نعيش مـآ نكاتل ؟
و مـا نَهَاتِـي لأننا إخترنا الطريق عايزين نواصل؟
أو أقلها لو نميز روحنا في جُلّ المراحِـل ؟
و هـيَّ كم ؟
حدثني عن فاصِل مُـهم ؟
بالله في العمر السعيد
سِبتَ الجنون و أغراك نُضج؟
هل مرة ثرثرة الكلام صابت صِدق؟
قلبك عليك عايش مَلِك؟
و في ياتو لحظة العقل بيقول كِش مَلِك؟
قادر تعافر لـي طموح؟
ما بِتَّ بالتشويش كفيف؟
ياخ لسه إيمانك بخير،
ولا أصبح شئ وليف؟
هل في زُمام الفِكرْ صَلْبْ؟!
ولا مالِيه حيرة زيف؟
جارية السنين زايداك سنين
دي الشئ الوحيد الما بقيف
و لازلت إنت كَـما عمود
مغزوز على حافة رصيف
أجواء تغيب
أجواء تهِل
و الحال مُمل
باللّٰه ما حالاً سخيف؟!
أنا الحُب البقولوا الناس
ده ما بيعنيني أبداً لأ
و أنا الزول الأعيش جَنبه
ده لازم للعيون يقرأ
..و يساند لمّا أتألم
و إلا الحُب ده كيف يبقى؟
تعبت معاك و حيل مافي
و لكن فيني نزعة روح
أقيف على مبدئي و أعاند
و يا سيدي المُراد؛ ممدوح
"فلا إنت الحبيب صاح
ولا أنا ليك رفيقة الروح"
فؤادي على هواك م بِمِيل
و أظُن طرح الفُراق مسموح
كفاية عليّ ضياع الحيل
فـ عُذراً لو مشيت مجروح.
أقِمتُ اليوم لكَ موكب "أنا بِمفردي" لِـ تسقُط "أنت بِحملكَ" عني، و قد كان!
كلفني هذا الحُب العــاديّ؛ ساعتين و نِصف سيراً بالأقدام، و عبور جِسرٍ فوق الماء كُنت أهابهٌ، و ألمٌ بالرأس إثر الأتربة المُنتشرة بالجو بينما كانت تَضِج أصواتاً موسيقية صاخبة بِـ أُذُنَي.
سِرتٌ مُسرعة الخُطى بل و عازمة الوصول غير مُتحليةً بالصبر؛ لأصِل الرُكن الأخير لجميع زوايا المنزل.. فما إن وصلته غير جاثية على رُكبتيّ من الحُب أو الندم، فـ إنكَ ساقط و إنني الآن حُرة.
بقصُد أقول:
إنه إحتمال الحُب يضيع
في الهوان ده يزيد وجعنا
تبهت ألوانا و نبيع
من بعد ما بقى لينا معنى
فلما تبعد..
إحتمال نفقد أمل
و إحتمال نرجع سريع
يشغلنا إحساسنا الجمعنا
ألف مليون إحتمال مع كل كلمة
دي الشهور بتجيب سنين..
و السنين دي عقاب عُمرنا !
و يعني ماا مُطمنة
ولا قادرة أقول الجاي خير
فـ لو الوعود إتغيرت!
أنا لسه قلبي معاك كبير 🖤
ما نساوم الدُنيا بشعور
ماليهو خوف و إحساس مرير
واضح كده؟
الإحتمالات مُمكنة
في الحب ظنونا عليك كتير
و ما مشكلة،،
بس قلبي ما بحب العذاب
تبقالي أو ما تبقى لي
قسمة و نصيب
لو بينا باب
لكن تجي لقلبي بثبات
ترمي الشِباك
بعدين تغيب!
.. فـ البينا غاب.
ما البينا ما سكة و وصول
و كان أعزم الخطوات بجيك
ماك سبت ماضي ملان سرور
مانعني أبقى بلاك و فيك
يوم سبتني..
كُت بفقدك ساعة الوصول
مع ذكرى بشيلها ليك
نظراآات مع الآلام تطول
بوجع البفوت قُبال يجيك
و هل من سؤال منك وصل؟
أو من حنين أعلن حضور..
يوم كُنت بطمن عليك؟
ما ضُغت إحساس الفقد؟
ما فيك حزن أبدى العبور..
و ألم المحب ما زار عينيك!
ما فهمتني،،
الشوق مع الأيام بزول
و رميتو حِمل الفات عليك
و بقيت خلاص،
زيك كما زي أي زول
كان غبت إحساسك بغيب
و فقدتني!
ما باقي بعد القلتو قول
من جوة فاضية و قلت ليك
ما كنت فعلاً بشبهك!
و إن باقي كلمة و دايرة قول
فـ دي باقية منك.. و شيلها ليك.
ما ناوية أبداً أطوِل المُشوار عليك
و أنت كنت في نفس المكان هنا من سنة
مع شخص تاني
في قصة تانية
رواية باتت مُحزنة!
نفس الحكايات و الأماني
و حتى نفس الإحتياجات مُعلنة
و ما حاسة فرق..
يمكن يكون الإختلاف
وارد، فقط في الأزمنة
و عشان كده..
والله ما بقدر أدور
حولين جِراح مُتكررة
من تاني أتخطى المشاعر
بي برود كده أهملها
معقولة أقبل أعيش سند
و أقطع درب مليان عوج
نفس المشاوير القديمة
تاني من دون تسمية؟!
أنا كنت في نفس الوضع
راضية و عديل..
مبسوطة بالمُتحملاه
قبلانة بي أنصاف حلول
ما بين غياب..
.. و بهتان حِضور
و الأسئلة الطالت سنين
و معاني بي حِس التعود مُبهمة
لا شخص بادر بالوضوح
ولا كُنت من أجل الوعود مُتطلبة
و طولت حبل الصبر لين
أصبحت من ذات الشعور مُتجمدة
لا الفينا عاشت لا لقينا الأجوبة
و عشان صعوبة الوضع ده!
بالله حدد قِبلتك
أفهم عواطفك.. و قدرها
و أنا أصلو ما لازمني تاني
أعيدها ذات التجرُبة.
