#أنا_بأسف

أنا بأسف.. على كل المسافات فينا بتأسف
و بتراجع.. و لو منك كتير البعد كان واجع
أنا البخسر.. مدام ببني الحواجز و إنت بتكسر
وأنا بأسف.. و لو تلت الفؤاد جواك بدأ يتلف

و لما بديت..
فُتً بعيد من الواقع و ما حسيت
و شلت الجرح خوف ماضيك هدمت البيت
و ياك شقيت...
مشيت ودعت من دون علم
قال سايبني شان أقسى وشربت السم
تسيب  دنياي و تتمناني لحظة هم
و أنا المكسورة من طبعك
و لكن راضيه تاني أضم

بس أسمعني..
ما تسألني أنسى غياب تعب همي و بكاهو دمعي
و خليني.. جرحي مع السنين بصغر و ح أتحسن،
دام قربك مُساندني
و طبع القسوة كان جواي و ألمك أبقى سامحني
دا كان منك..
مدام طبعك أكيد فاهم ظروف دنياك و فاهمني

و أنا بأسف.. على فقد المحنه البينا بتأسف
و بتراجع.. و ليت بعد الأسف ألقاك لي راجع
و أنا البخسر.. وكيف نرضى الحواجز قُربنا تفسر.

وبرضو تسأل

   مرة لو جربت تسأل.. من معاني الإشتباك؟!
   تلقى إنك فيك ضايع حتى ما عارف خُطاك..

               لا وضوحك لا غموضك
                   لا حنانك لا جفاك..
                لو بتسأل ولا قاسي
                 ولا باقي على مُناك..
   ما ح تعرف عن ملامح عن كيانك في هواك..
  ما ح تعرف عني جنبك و سيرة القلب المعاك..
                إلا تهبش في سكوتك
          كلٍ إحساس عاش في نبضك
           و فاكرو بي حُب في الفؤاد

             و بعد ما تلقى البجيبك...
                أبقى راجع ليا تاني
                م الرواية بلا أماني
     تاني أسأل مني و أعرف.. ليه بعدتك؟!

           كيف تكون من قلبي ضايع
     و برضو تسأل عن معاني الإشتياق؟!
    تبقى خالط بين بُعادي و بين وجودي
         و أبقى لازم أرضى بحل الفراق!

ناس كتير عرفت تحب

              جوة الحنين.. ترداد سؤال..
      كيف عشنا لينا، و هسي لو حسينا شوق
              يجمعنا بس وحي الخيال؟!
             كيف عشنا نتمنى في بعض..
              و مشينا للفرقة إختيار؟!

               بعنا السنين لأجل الممات
               سبنا البُعاد كسر القلوب..
                و الكسر بئلمنا بسُكات!

                     و نفس المكان..
              واقفين محل الذكريات
  و نقول بننسى و نرضى، أصلو الفات هو فات
    واجعين بعض.. و وجعنا في البُعد الثبات!

                       جوه الحنين..
       كان قصة عاشت بينا يوم حسينا حب
          و كم ذكرى أنا و إنت في طريقنا..
                  شلناها للأيام مدد...
            معليش نسيت "أيام مضت"!

         و أهو ناس كتير عرفت تحب..
            وريني بس كم زول قدر
        يحفظ معاني الحب في وعد؟!
            بيقولو ما ح نسيب بعض..
  ..و يسيبو قولهم لو يحسو في لحظة ضغط!
        ينسو الكلام القالو وقت اللهفه ديك
            لا زول يشد ولا زول يمد
          ولا يبقو يوم أنصاص بعض

         و أهو ناس كتير عرفت تحب..
و شوية منهم دابو بعرف،،  كيف يكمل للأبد.

فاتك حنان كل العمر

كنت ناوي على الفراق كنت ماسك في الجمر
و البينا داك صابح سراب لمن أبيت قلبك تسر
من لما فتني يا حبيب فاتك حنان كل العمر
            والليلة جاي عشان خلاص
               في الدنيا لاقاك كل مر
من بعدي كيف كان الأسى و مين القال إنو بيسر
ما كنت فاكر يوم تغيب بعدك ح أعيش الدنيا حر
              صدقني عشتك في العذاب
              من وجعي ما لقيت لي مفر
نادتني دنيا الوحدة زيف في البعد شلتك ألف سر
طولت في النسيان عشان من قلبي عشماناك تمر
لكن خلاص ضاع الأمل و تعبت فجأة بقيت بمل
أديتني فرصة مع الغياب أنساك مرة على الأقل
                يعني الرجوع أسوء خيار
              من دونك أحسن و لاقيه حل
القصة خلصت بي جفاك و رجوعنا ما ح يضيف سطر
و أنا ذكرى واجعة عشان كمان فاتك حنان كل العمر

ما مسامحه في أي شئ

ما ياما قلت خلاص سماح
مش ياما خليت باقي لي
لاحقة الأمان من ماضي راح
كل الخلق كايسة الطريق
كم زول وصل بسكة صاح?!
مش برضو لليوم الجديد
بتشيل معاك نية السماح
عشمان يكون أجمل أكيد
مستني فيه الإرتياح

و أنا فاكرة من عدة سنين
شديت رحالي و من بعيد
ناديت على نفسي و مشيت
وريتها بكرة في يوم جديد
صانت قديمي و ما حكيت
سامحت بتذكر زمان
شاغلاني نفسي معاي بقيت

بعد الوقت جرى بي كتير
راجعت وجعي الكان قديم
بي حرقة جات نازلة الدموع
ما فاكرة كان الشلتو فيهم
ما أديتها فرصة زمان تكون
ما أدتني فرصة أحس بيهم
شايلين هزيل حس الوجع
عاطفين علي حنيت عليهم
بعد البكى،، إستغربت فيهم
من وين هي جات لي تشتكي
أنا كويسة عايشة مع السماح
يعني الدموع من وين تجي?!
فتحت أحضاني و لقيت
رغم إني بادية و من جديد
ما مسامحة كان في أي شئ
لا نازفة لاااا من العذاب مستضعفه
لا كل يوم بسرد وعود و أجي أخلفا
ولا كنت وجعة قصه أو متكلفه
و العشتو رايح نصو خوف
و الدنيا ما بستهدفا
و الماضي عايش لسه حي
ما ناسية خوف كتمو الوجع
لا ما مسامحة في أي شئ

لما الأحاسيس تختفي

لما الأحاسيس تختفي
قبل العتاب ما بينا صابح منتهي
و الإنتظار لي أوضح الأوجاع
و أجمل من تجي
و كأنه كان كل الكلام
جوة المعاني بيرتشي
حتى الحكاوي و كان و كان
زي ذكرى لي عالم خفي
لما الأحاسيس تختفي
يبقى السؤال طالع غلط
و الديمة ليك في قربو حق
تلقى المسافة بقت فرض
و الكنت بتحسو بأمان
خان الأمان هاجر أحاسيسك مرق
لا فارقة يبدأ يكون بعيد
لا حتى متمني القرب
و ح تحسو كيف!!
عمرك و كان بحبي بأمل
تلقى المعاني الرايحة فيه
فجأءة إنتهك زمنك ملل
علشان رجيت العشت ليه
علقت في بالك صور
راحت و ما إتعلقت بيه
و الحيرة تبدأ تخش عليك
معقولة في بداية الطريق
ألقى الحريق
كل الجمعتو بيتسرق
معقولة فطاني المطر
واقف براي و أنا بتخنق
إتبرا مني الحس و فات
و الذكرى غطاءها التلج
و الباقي باقي من الرماد
لو فيه نبض
يادوب يعيش علشان يهد
و كيان بضيع أو بختفي
لا راضي قلبك بالسكوت
لا بالكلام عايز تفئ
و تبدأ الأحاسيس تختفي
لا إنت مهتم بالفضل
لا نفسك إفضل منو شئ!

أنا عايزة نرجع زي زمان

و أنا كل ما صورتك تمر
بتقل على خاطري الحمل
خاطر سند دايما و شال
ولا حبو ليك في يوم كمل
إحساسو بيك ياداااب برد
كان لسه عشمان فيك أمل

و أنا شايفة جد إنك تقيل
قربك دا شئ لا يحتمل
حبك و مخلوط بإنتظار
و الإنتظار شايل ظلم
أما الثواني معاك خوف
ولا زول وحيد منك سلم

و أنا عايزة نرجع زي زمان
ما بينا غير بسمة و سلام
و كان عوزت تحكي معاي في يوم
بكويها في خاطري و بجيك
و ما تخاف أعوزك ما بجيك
بس نفسي نلغي الإهتمام

و كان شفت بعيوني الحزن
إياك تسأل زي زمان
في خاطري منك جد كتير
إياك تعاين لي عشان
ما ناوية ليك أشكيك كتير
و أنا برضو لا بسأل عليك
لا بيك ح أهتم في المكان
ما عندي أكتر من بعاد
يا ريتو ظني القاسي خان

أنا عايزة نرجع زي زمان
ما بينا إحساس ببعض
ولا بينا روح حابة الكلام.